tg-me.com/drug0pen/102
Last Update:
يا ترى مريض القلب بيخس ولا بيتخن ؟؟ وانهى احسن لو خس ولا لو تخن ؟؟!!!
طبعا الاحسن انه يلتزم بوزن صحى ( لا خاسس ولا زايد ) وعشان كدة مريض القلب لازم يقيس وزنه يوميا حتى لو مش بيشتكى من اى اعراض عشان ياخد باله لو حصل له زيادة فى الوزن .
فى الاول مريض القلب بيتخن سواء كانت عنده مشكلة فى نصف القلب الشمال او كانت المشكلة فى النصف اليمين . لان لو المشكلة فى الشمال هتلاقى المريض بينهج ومش قادر يتنفس براحته ولما بيتشخص وبيعرف انه مريض قلب وانه محتاج يرتاح بيرةح ممدد على السرير وهت يا اكل لانه هفتان وبينهج والدكتور طلب منه راحة وبالتالى أكل كثير وراحة اكثر تلاقى الوزن زاد . اما لو المشكلة فى النصف اليمين فمعنى كدة ان نصف القلب اليمين مش قادر يستقبل دم صح وبالتالى الدم ده يركن ويستنى فى الاوردة وشوية شوية ضغط الاوردة يزيد تقوم تنشع ميا على برة ويحصل Lower Limbs Edema وممكن بعد شويتين يحصل استسقاء والبطن نفسها تتنفخ ميا .
الاديما دى عشان تحصل بيسبقها زيادة فى الوزن وعشان كدة قلنا ان المريض لازم يوزن نفسه وغالبا المريض حتى لو لم يوزن نفسه بيحس انه جسمه تخن وده عن طريق انه بيلاقى مقاس الجزمة ضاق على رجله او ان الشبشب بيسيب علامات على جلده او البنطلون بقى ضيق عليه لان كل ما الاديما زادت هاتزحف على فوق وتوصل الى سمانة الساق ثم الافخاذ .
طيب امتى بقى يخس ؟؟!!!! فى المراحل الاخيرة من المرض ودى علامة سيئة جدا ومعناها Poor Prognosis . الخسسان ده بيحصل فى حالة مشاكل نصف القلب اليمين فقط وده بسبب حدوث اديما زى ما اتفقنا بس لو حصلت الاديما دى فى المعدة هاتعمل فقد فى الشهية وتعمل Bloating يؤدى الى احساس سريع بالشبع ويعمل كمان غثيان . كمان الاديما بتحصل فى الامعاء وتعمل Malabsorption وبالتالى المريض فقد شهيته وحتى لو أكل هيعانى من شبع سريع وغممان نفس والاكل القليل اللى أكله مش هايمتص كله وكمان سرعة الحرق عنده عالية لان المريض ده فى دمه تركيزات عالية من Catecholamines ودى بتزود سرعة الحرق وكمان الكبد عنده كسلان ومش بيخلق بروتينات بسبب Liver Edema
كل الاسباب دى تعمل فقد حاد فى الوزن بيسموه Cardiac Cachexia لدرجة احيانا المريض فى مراحله الاخيرة ممكن تحس انه مريض كانسر لانه حرفيا جلد على عظم وبالتالى دى علامة خطيرة ومش حلوة خالص للمرض لانها مش بتحصل الا فى المراحل المتقدمة .
رمضانكم كريم
BY قناة الدواء والقلم💊✒️
Warning: Undefined variable $i in /var/www/tg-me/post.php on line 280
Share with your friend now:
tg-me.com/drug0pen/102